12.04-15.04.2015

Unglaublich, nach 3 Stund fliege bisch immerno im gliche Land:-) Und 3 Stund Flug ohni Unterhaltigsprogramm und Verpflegig isch rächt grenzwärtig…

Pünktli simmer in Perth glande, si diräkt is Hotel, wo wider e gueti Lag diräkt im Chueche ka het, und den simmer au scho wider ab uf d‘Stroos. Dr Hunger het uns in ä feins Restaurant zoge, wo sich als ächte Gheimtipp usegstellt het. D’Stadt Perth luege mir spöter a.
Nachere nit so ruhige Nacht (hesch gmeint dr Nochber got diräkt bi dir ufs Klo) händ mr uns risig uf unseres Mooooonster und s‘neue Dihei für die nexte 60 Tag gfreut.

Gäg die halbi 10 simmer bi dr Pick Up Station gsi. Da mr die einzige gsi sind isch es grad losgange mit dr Beguetachtig und jääää s’isch e riiise Teil. S‘ Inneläbe nit ganz so praktisch wie bim chleine vorhär aber sisch halt au e 4li4 und nit e Tussicamper alles rächt massiv baut.

Druf abe isch es losgange! Dr Dani isch halt scho e Checker und het das Monster grad im Griff ka. Unseri Tourdate händ mr am Morgen no ganz spontan um 180° gänderet. Die neui Route isch Jetzt: Perth-Hyden-Lake King- Norseman- Esperance-Albany und denn dr Küste entlang wider uf Perth ufe. Zerst ins Innland fahre isch e super Idee gsi. Sisch wahnsinnig wie schnäll me doch wieder ganz elei isch. Am Tag chrüzt me ca. 5 Autis, und wenn z’Nacht mol öper uf em Campingplatz gsesch bisch grad froh:-)

Wommer zobe is Bett sind händ mr dänkt es isch ca. 10, halb 11 aber nei es isch efang halbi sibni gsi… Do wird’s am 6 stockdunkel und zobe isch es würkli früsch, also got me halt undere.
Die ersti Nacht in unserem Monster isch okey gsi. Die optimali Lösig für’s Inneläbe do händ mr noni, dr Dani würd am liebste sälber hand alegge und chli umbaue:-)

Am Morge, au wider am halbi 7, simmer verwache und bi stahlend blauem Himmel grad e Ründeli uf em Felsplateau go laufe und die erste Sunnestahle go tanke. Unseres hüttige Ziel Wave Rock, händ mr nach guet 60 Min. erreicht und sind ächt erstund gsi wie geil das die Felsformation würkli isch. 15 Meter hoch und 110 Meter lang. E Felse wo usgseht wie e Wälle wo churz vor em bräche isch. Mega! Mir händ dr grossi Rucksack drbi ka und sind usgrüstet gsi für e grossi Wanderig.
Was ich immer mol wider khört ha isch, dass e in WA vieli Fliege het…dass chani nur bestätige!!! In d’Ohre, in d’Nase is Mul und eifach überall wo si nit ane sette, gönt si ane. I bi fix und foxi gsi numme vom wägschüche!
Mir händ denn unsers Zmittag im Auto gässe, und sind gmietlich witergfahre nach Lake King. Do acho ufemne schöne Campingplatz, händ fein gässe und teste hüt mol s’Bett im untere Stock vom Monster.

Morn chönne mer s erst mol de 4×4 Gang ilegge, wenn mer Glück hän!
Bis bald!