08-09.04.2015

Wommer am Mittwuch morge verwache sind händ mr zerst mol gstund wie chalt das es isch. Es het die ganz Nacht gstürmt und immer wider grägnet . Uns isch aber sofort warm ums Härz worde wommer d’Vorhängli ufgmacht händ und die viele Kängurus um uns umme wohrgno händ. Ganz zfriede sind si um dr Campervan verteilt gsi und händ gfrässe. Soooo siiiiess! Mir händ däm Ganze sicher 1 Stündli zuegluegt sind den go dusche und den wider ab uf d’Great Ocean Road. S’Hüttige Ziel bi rägnerischer Verhältniss sind die 12 (aktuell sis no 9) Apostel gsi. Mir händ nit lang miese fahre und scho sind si uftaucht. Scho idrücklich. Sogar d’Sunne het sich zeigt, sodass mr unseri neui Kamera mol so richtig händ chönne usprobiere. Mir si vor de grosse Touribüs vor Ort gsi und händ so die Ussichtsplattforme ganz für uns elei ka. Gstärkt mitemne feine Kaffi simmer dr Great Ocean Road witer gfolgt. Sisch immer öpe glich gange; 1km fahre, ahalte, gniesse und das ca. 8 mol! E wahnsins Kulisse!
Nach däm morgendliche Spektakel händ mir mol chli Gas ge und sind bis uf Mount Gampier gfahre. Mount Gampier isch für sin Kratersee Blue Lake bekannt. Dä See isch vo Oktober bis März tiefblau was wunderschön usgseht. Mir händ leider chli e bedekte Himmel ka, dass es nit so zur Gältig cho isch.

Nachere guete ruhige Nacht ufemne schöne Campingplatz simmer am nexte Morge wider frie uf will mir im Sinn ka händ am 18.00 zobe d’Fähri uf Kangaroo Island zverwütsche. Unterwägs händ mr die Idee den aber lo stärbe, sisch sehr tür mit dr Fähri und Zyyt händ mr au chli zwenig also isch s’neue Ziel Adelaide Hills. Zwüschem neue Ziel und em damalige Standpunkt si 400km gläge das heisst e Autotag, aber ganz ohni Stress. Mir händ uns schön abgwächslet mit fahre, si vo Mount Gampier nach Robe, vo dört nach Kingston und zum jetzige Campingplatz in Wellington. Unterwägs het dr Dani no die irrwitzigi Idee ka vo dr Stross wäg e Umwäg z’mache. Wonni die Stross gse ha isch mr fast s’Härz sto blyybe. Mir händ weiss gott kei Offroader aber unsere Van händ mr kurzerhand erfolgrich als so eine gnutzt. Mir si mit 20km/h unterwägs gsi aber was mr wider an Kulissene gse händ isch wunderschön gsi. Salzseeä.

Ca. am 18.00 simmer bi unserem hüttige Schlofplätzli acho, händ fein kocht und jetzt pfuse mr au scho wider. Morn gots den in d’Bärge.