Tag 3 in Sydney

Hüt händ mr fieh ufstoh uf em Programm ka… aber bis mi Powerranger am Morge amigs us em Bett chunt gots halt eifach  chli länger…

Trotz allem si mr uf dr 10.18 Zug Richtig Blue Mountains. Ca. 2 Stund got die Fahrt i dene würklich schöne Züg. dAustralier achte sehr  druf das in de Züg nit lut gredet wird, dMusik vo de Kopfhörer liislig isch,  und me bittet dLüt sNatel abzstelle,   so isch es e würkli friedlichi Fahrt bis zum Usgangspunkt Wentworth Falls gsi. Vo dört sich den dSuechi (ich ohni Orientierigsgen has plant:) losgange. Mol links, mol rächts und den aber doch gradus! Egal mir händs gschafft. Dr Dani isch seeeehr skeptisch gsi am Afang, zviel Lärm, zviel Lüt und alles isch überbewärted bis den aber mol dr ersti Wasserfall cho isch.  EIfach wunderschön und zu unserem Erstune si mr ganz elei gsi!

Nach ca. 2 Stund wandere si mir an unserem eigentliche Ziel de Wentworth Falls acho. Will mr aber so schnäll gsi sind händ mr nomol e Tour agfange und sind mitere würklich unglaublich schöne Kulisse belohnt worde! Wahnsinn, dass hinter sonere grosse Stadt sone Naturwunder zfinde isch…!!

Die zweiti Tour womer agfange händ isch den doch no 3 Stund gange und zwar ganz schön opsi! Nach gfühlte 5000  Stägetritt si mr den äntli i somene Buschrestaurändli acho und händ uf die würkli sehr cooli Wanderig und die  wunderschöne Blue Mountains agstosse!

Wider zurgg im Zug händ mr miese ufpasse das mr nit grad beidi ipfuse, jääää mir händ unseri Beinli scho rächt gspürt:)

E feins Ässe bim Italiano het dä Tag no perfekter gmacht 😉

Jetzt freu mi uf dr Bondi Beach morn…